«Тіл шебері-2019 »

Бүгін Нұр-Сұлтан қаласы әкімдігінің Тілдерді дамыту және архив ісі басқармасы, «Руханият» КММ ұйымдастыруымен мемлекеттік қызметшілер арасында «Тіл шебері-2019 » байқауының қалалық іріктеуі өтті.
Байқаудың мақсат-міндеттері:
Үш тілді – қазақ, орыс және ағылшын тілдерін жетік меңгерген жас мемлекеттік қызметшілерді анықтау және қолдау;
Тіл мәдениетін көтеріп, жастарды білім бәсекесіне шақыру.
Сайыс 3 кезеңнен тұрды. Алғашқы кезеңде қатысушылар ана тілімізде таныстыру жасаса, екінші бөлімде ағылшын тілі бойынша біліктіліктерін ортаға салды. Қорытынды кезеңде әділ-қазылар қатысушылардың орыс тілін білу деңгейіне бағасын берді.
Үш кезеңнен тұратын байқауға 21-30 жас аралығындағы мемлекеттік қызметшілер қатысып жатыр.
17 қатысушы бақ сынаған сайыста Нұр-Сұлтан қаласы, Мемлекеттік сатып алу және жекешелендіру департаментінің бас маманы Серік Гүлжан Серікқызы бас жүлдені иеленіп, республикалық кезеңге жолдама алды.
Қалған қатысушылар арнайы алғыс хаттармен және бағалы сыйлықтармен мараппаталды.

«Руханият алаңы» пікірталас клубы

Бүгін елордадағы №2 Өнер мектебінде «RyhTime» жобасы аясында ҚР суретшілер одағының мүшесі Алмас Сырғабай және белгілі суретші, @ansa.kz брендінің негізін қалаушы Аңсаған Мұстафамен кездесу өтті.

Жиынға қатысқан дарынды оқушылар мәртебелі меймандардың сұхбатын ұйып тыңдап, суретшілер әлеміне саяхат жасады.

Алмас Сырғабай суретшілік өнері әкесінен дарығанын айтса, Аңсаған Мұстафа дарынды балаларға арналған мектептің табалдырығын аттауына себеп болған оқиғасын еске түсірді.

А.Сырғабай туындыларын өзімен бірге ала келсе, әлеуметтік желі белсендісі А.Мұстафа қоғамдық мəселелерге арналған суреттерін слайд арқылы оқушылардың назарына ұсынды.

Суретшілермен рухани сұхбатқа қатысқан оқушылардың дені суретшілікке әуестеніп жүрсе, қонақтарға қойылған сұрақтар да қарапайым болмады. Дарынды өрендердің сауалдарына кезек-кезек жауап берген қонақтар суретшілік өнері еңбектенген, ізденген адамға ғана жолдас болатынын баса айтты.

Осы орайда А.Мұстафа:

– Мен үшін талант деген бос сөз. Себебі, балалардың бәрі талантты, сендердің бәрің таланттысыңдар.Тек ізденіс, тынымсыз еңбекпен ғана өнеріңді шыңдай аласың. Мәселен, қазір күніне сурет салуға қанша минутыңды немесе сағатыңды арнасаң, өскенде соншалық нәтижесін көресің, – дейді.

Ал Алмас Сырғабайдың тырнақалды туындысы – оқушы кезінде Мұқағали Мақатаевтың «Қайран жеңгем…» өлеңіне арнап салынған иллюстрация екен. Сондай-ақ, ол бала кезінен балаларға арналған газет-журналдарды үзбей оқып, ондағы суреттерге қызығып өсіпті.⠀

Бүгінде ол – қазақ халқының тарихын, мәдениетін, танымал тұлғаларын, тіпті, тауқыметті жылдардағы ел тағдырын қылқаламмен бейнелеп жүрген бірегей суретші. Ол да ізін басқан жастарға ақыл-кеңесін айта келе:

– Ақын Қадыр Мырза Әли: «Оқу – ежіктеуден, өсу – еліктеуден басталады» – деген. Суретті көшіріп салу, алдыңғыларға еліктеу –

заңдылық. Бірақ, өзіңнің қолтаңбаңды қалдыру үшін көп еңбектену, көп іздену, көп оқу керек, – деді.

Жиын соңында қонақтар дарынды оқушылардың суреттері қойылған көрмені тамашалап, жас өрендердің туындыларына жоғары баға берді.

«АСТАНА НАУРЫЗЫ»

«Руханият» коммуналдық мемлекеттік мекемесі жыл сайынғы «Астана наурызы-2019» қалалық іс-шарасын өткізді. Іс-шара 3 бөлімнен тұрды. Алғашқы бөлімде қаламыздың белсенді жастары Елорда тұрғындарын Ұлыстың ұлы күнімен құттықтап, қоғамдық көліктерде, аялдамаларда, СОО-да ән айтып, жырдан шашу шашып, мерекелік сыйлықтар ұсынылды. Дәстүрге байланысты сұрақтар қойылып, жеңімпаздарға сыйлықтар үлестірілді. Нәтижесінде қала бойынша 1500 адам Наурыз мерекесіне арналған сыйлықтың иегері атанды.

Екінші кезеңде зиялылардан құралған сарапшылар мемлекеттік мекемелер мен ұйымдар құрған киіз үйлердің құрылуына және дәстүрдің сақталуы мен насихатталуына жасалған жұмыстарына әділ бағаларын берді. 4 ауданда құрылған 30-ға жуық киіз үйді аралаған сарапшылар 5 аталым бойынша жүлделерді бөліп берді.

Үшінші кезең қаламыздағы Жастар театрында өтті. Наурыз мерекесінің қорытынды кешінде үздік деп танылған киіз үйлер мен әлеуметтік желіде Наурызды белсенді насихаттаған блогерлерге жүлде тағайындалды. Нәтижесінде, киіз үй аталымы бойынша бас жүлде Отандастар қорына бұйырса, әлеуметтік желіде Ұлыс күнін насихаттаған Елордамыздың жас тұрғыны Айкерім Ерланқызына бұйырды. Одан бөлек, қатысушылардың барлығына ынталандыру сыйлықтары үлестірілді.

«Руханият алаңы» пікірталас клубы

«Руханият» коммуналдық мемлекеттік мекемесінің ұйымдастыруымен 2019 жылғы 6 наурыз күні Астана қаласы мемлекеттік архив конференц-залында «Руханият алаңы» пікірталас клубының кезекті «Рухани жаңғыру: аты-жөніңді ұлттық негізде рәсімдеудің мәні мен маңызы» атты семинар-кездесуі өтеді.

Мақсаты: Елбасымыздың «Рухани жаңғыру» бағдарламасы мен «Ұлы даланың жеті қыры» мақаласын негізге ала отырып, аты-жөнімізді ұлттық негізде рәсімдеудің маңызы туралы өзекті мәселелерді қозғау. «Ов», «ова», «ев», «ева», «ин» қосымшалардан құтылу.

Жиынға ҚР Әділет министрлігі мен құқық қорғау органдарының өкілдері, Халыққа қызмет көрсету орталығының мамандары мен лингвист, филолог ғалымдар, қоғам және мемлекет қайраткерлері, әлеуметтік желі белсенділері қатысты. Жиында аты-жөнді ұлттық негізде жазудың маңыздылығы айтылды.

«Пай-пай өмір…» әдеби-сазды кеші

Астана қаласы әкімдігінің Тілдерді дамыту және архив ісі басқармасы, «Руханият» коммуналдық мемлекеттік мекемесі және Л.Н. Гумилев атындағы Еуразия ұлттық университетінің «Алқа» ұйымы бірлесіп, 26 ақпан күні сағат 15.00-де Л.Н. Гумилев атындағы ЕҰУ-дің ОЗҒ конференц-залында (Қажымұқан көшесі, 11) «Жастар жылы» аясында қазақтың ақиық ақыны Мұқағали Мақатаевтың шығармашылығына арналған «Пай-пай, өмір…» атты әдеби-сазды кешін өткізді.

Кештің мақсаты: Поэзия алыбының сезімге толы сыршыл өлеңдерін көпшілікке кеңінен насихаттау. Мұқағалидың рухани мұрасы аясында жыр сүйер қауымды біріктіру. Жастарды отансүйгіштікке, қазақ тілін құрметтеуге шақыру.⠀

Кешке белгілі ақындар Қалқаман Сарин, Серікзат Дүйсенғазы, Дәулеткерей Кәпұлы және т.б әдебиет өкілдері, оқу орындарының, қоғамдық бірлестіктер мен жастар ұйымдарының жетекшілері, белсенді жастар және қызығушылық танытқан барша қауым мен БАҚ өкілдері қатысты.

«RYHtime» тұлға-танымдық жобасы

2019 жылы 13 ақпан елордадағы №5 Балалар кітапханасында «RYHtime» тұлға-танымдық жобасының кезекті жиыны өтті. Бұл жолы астаналық тұрғындармен жүздесуге филология ғылымдарының кандидаттары, доцент Ербол Тілешов пен Омар Жәлелұлы келді.

Заманы бір екі ғалымның да көздегені ұлттық мүдде болғанымен, әр адамның жеке пікірі болуы керектігі бүгінгі рухани сұхбат барысында тағы бір дәлелденді десек артық емес.

Бұл жүздесуде қоғамның бүгінгі келбеті, жастар және тіл мәселесі, тәрбие, тектілік тақырыптарымен қоса латын графикасына қатысты да әңгіме қозғалды. Рухани жүздесудің бейненұсқасын әлеуметтік желідегі парақшаларымыздан тамашалай аласыздар.